पर्खाई

धेरैपछि नेपालीमा लेख्ने चेष्टा गर्दैछु । भूल-चुक माफ गर्नुहोला । शुक्रबारको दिन, अफिसमा बसी रहेको थिएँ । काम धेरै नभएपछी सार्‍है पट्यार लागेर आऊछ । त्यसमाथि पनि, बाहिर हिँऊ परिरहेकोथियो । बिहीवारको हिँऊ सफा गर्दा गर्दा सारा जिउ दुखिरहेको थियो । फेरी पनि दु:ख पाउने भैयो भनेर दिक्क लाग्ने भैहाल्यो ।कतिबेला घर गएर बुढीसँग मिलेर म:म बनाएर खानुजस्तो भैइरहेको थियो । अनि हेडफोनमा नारायण दाईको गाना बजिरहेको थियो । अनि त मलाई के चाहियो - म त नेपाल नै पुगेछु । दस मिनेट समय अनि Unicode मा Nepali Typing को नतिजा - यी तलका हरफहरु :
------------------------------

पर्खाई

हिउँ हेर्दै, टोल्हाएर बसेको छु
अनन्त देखिको पर्खाईजस्तो
न त पाउने आश छ, न त आउने
किन, केको पर्खाई हो टुङ्गो लाउन बसेको छु ।

मेरा ईच्छाका बिम्बहरु प्रत्यक्ष भैदिए
सुम्सुम्याएर, जतन गरी स्याहार्ने थिएँ
आकांक्षाका ती दुर्लभ जिनीशहरु
कति स्नेहसहित हुर्काउने थिएँ
तर, मेरा रहर कुनै नवबिबाहिता जस्तो
मानसपटलको कुहिरो भित्र नै लुकिरहेछन
सैयौँ खोजहरुका बाबजुत पनि
लुकामारी मात्रै खेलिरहन्छ
यही लुकामारीको दोष हो
या त मेरो प्रयासको
म खोजी रहेछु, तर
मेर ईच्छाहरु लुकिरहेछन ।


मेरो खोजी ...
फेरी उहि अनन्त देखिको जस्तो,
चली रहेछन ....
केही गुमाएकोछु, न केही कमाएको
लेखा-जोखा गर्ने तराजु पनि
शायद मैले कहीँ हराएको छु
म भन्न सक्दिन मैले कहाँ, कति, कहिले गुमाएँ
बनाएकाहरु पनि जब म चिन्न सक्दिन
सबै प्रश्नहरुको भुमरीभित्र पनि
मलाई थाहा छ, तर
मेरो खोजी . . म रोक्न सक्दिन ।

तिमीले देख्यौ? तिम्ले भेट्यौ?
होइन .. के भनि नसोध मलाई
म प्रश्नहरुदेखि भागी हिंडेकोछु
मैले खोजी हिंडेको बस्तु भेट्यौ भने
तिमीनै आफ्नो बनाऊ त्यसलाई
हुनसक्छ, म त्यसलाई नै नचिनेर हिंडेकोछु
मलाई चिनाउन नखोज केही, कोहि पनि
भ्रमहरु नै सार्थक लाग्छन मलाई
अर्थ-अनर्थ नकेलाऊ मेरालागि
हुनसक्छ, सामर्थ्यको परिधी बिर्सिसकेकोछु ।

------------------------------
यती लेखिसकेपछि मलाई meeting मा जानु पर्‍यो ।
Even I wanted to continue it and probably give a better completion, but the next time I tried to do so, the juice was just not there any more. I thought - so be it.